Mugi tresna asih Gusti Yesus tansah lumuntur
dumateng kita sedaya.
Mbok menawi sampun dangu anggen
kawula mboten nulis acara-acara ingkang dipun wontenaken ing Gereja Katolik
Santo Andreas Ampel. Mboten kok kawula males anggenipun nulis, nanging amargi
kesibukan ingkang mboten saged dipun tinggal, pramila mboten wonten wekdal
kagem nulis ing blogspot punika.
Maturnuwun dumateng Gusti awit
amargi padamelanipun Gusti piyambak, ing Gereja Katolik Santo Andreas Ampel
saged ngawontenaken upacara Panampinipun Salira lan Rah Dalem Gusti Yesus
ingkang Kapisan. Upacara punika dipun wontenaken ing dinten Minggu surya kaping
10 Juni 2012 sareng kaliyan Mis Suci ing Gereja Katolik Santo Andreas ingkang
dipun wiwiti jam 09.00 WIB.
Nampi Salira lan Rah Dalem pranyata
wekdal ingkang sampun dipun tengga dening putra-putra panampinipun. Kagem
contonipun anak kula piyambak, sampun dangu anggenipun taken kaliyan Bapakipun,
“Kapan aku menerima Komuni ya Pah?” lan kanti sabar, Bapakipun ugi maringi
pangerten bilih nampi Salira lan Rah Dalem punika perlu persiapan ingkang
dangu. Kedah wonten pelajaranipun, kedah siap lahir punapa batin, lan
sasampunipun nampi Salira lan Rah Dalem Gusti ugi gadah tanggel jawab supados
tansah sae anggenipun gesang wonten ing ngalam donya.
Acara punika dipun dereki dening 10
lare, wiwit kelas 3 SD ngantos lare kelas 8 utawi kelas 2 SMP. Wondene
lare-lare punika dipun siapaken kanti sae dening para pembimbing ingkang sampun
mumpuni wonten bidangipun, inggih punika Bapak Y. Sugino kaliyan bapak FR.
Prayitno.
Paroki Boyolali ingkang dados penyelenggara utama
acara punika ugi paring hadiah dumateng lare-lare, arupi Puji Syukur, Salin,
gantungan kunci ugi arupi Rosario.
Panampinipun Salira lan Rah Dalem
Gusti Yesus dipun wiwiti kanti arak-arakan lare, sareng kaliyan lektor,
prodiakon lan Romo. Sasampunipun dumugi ing Gereja, dipun lajengaken atur
pasrah dening tiyang sepuhipun lare dumateng Romo, ingkang isinipun, ngaturaken
bilih lare-lare punika sampun siap nampi Salira lan Rah Dalem Gusti Yesus
ingkang kapisan. Lajeng Mis Suci dipun wiwiti.
Ing Upacara Panampi Salira lan Rah
Dalem salajengipun dipun wontenaken pembaharuan janji Baptis ingkang ugi dipun
dereki sedaya umat.
Lajeng para lare panampi atur pasrah dumateng Ibu
Maria ingkang dipun pimpin dening anak kula piyambak, Elisabeth Nathania Audrey
Mintarso.
Sasampunipun sedaya lumampah, lajeng para lare nampi
Salira lan Rah Dalem Gusti Yesus ingkang kapisan kaampingi dening para Bapak
lan Ibunipun.
Mekaten acara Panampi Salira lan
Rah Dalem Gusti Yesus ingkang Kapisan sampun kaleksanan kanti sae. Maturnuwun
dumateng sedaya petugas, Paduan Suara saking Seboto lan sedaya umat ingkang
sampun paring pambiyantu arupi punapa kemawon, mugi Gusti tansah paring
Berkahipun dumateng kita sedaya. Foto ingkang langkung pepak, saged dipun bikak
ing mriki.
Berkah Dalem.
